NEKROLOG
av Jakob Sande

Og dersom eg No, – det Vårherre må hindre,
gjekk inn til den evige ro,
då vart det på jorda ein syndebukk mindre,
og folk sat attende og lo.
Og so for dei gardande kring med ei liste
der kvar etter evne gav sitt,
tildess dei fekk bord til ei uhøvla kiste,
so bygda vart liket mitt kvitt.

So sette dei kista på skralaste kjerra,
og sa ho var god nok åt meg.
So tok dei or stallen den magraste merra,
og dermed so bar det iveg.
Fremst gjekk den halte Kristpinius klokkar
og vagga med ujamne fet,
og attanfor han i dei skravlande flokkar,
gjekk fem kreditorar og gret.

So lyfte dei kista frå stolkjerrekarmen,
og venta med knusande ro,
til presten steig fram med ei bok under armen, og tala til folket som so,
at “her ligg ein rest av ein rasande Saulus,
ein svolk i den vonde si hand,
som Gud kunne brukt til ein frelsande Paulus, for Kina og Sulukaff-land.

Men denne heldt fram med å stanga mot brodden, og rasa si gudlause ferd,
til målet var fullt, og han stupte for odden
av Herreguds tvieggja sverd.
Og difor kann folk ta han-her som eksempel, på ein som slo vrak på sitt kall,
og storma med Satan mot Salomos tempel
til kald på si gjerning han fall.”

Og folk sa som slik, at” har Hinmannen ridt han, og gjekk han for honom i grav,
ja, då var det jagu på tid me vart kvitt han,
før svinet sveid kyrkja vår av.”
Og so for dei heimatt og la seg for natta,
og ljost imot framtida såg.
Men sjølv låg eg djupt under jorda og skratta, og likte meg godt der eg låg.

Liker dere denne bloggen, lik og del gjerne innleggene!! Og følg gjerne Bunny i egne grupper på Facebook og MeWe, dette er den mest alternative og beste bloggen i landet – velkommen!

Følg Bunny på MeWe: Link!!

Følg Bunny på Facebook: Link!!

#jakobsande #nekrolog #dikt #bunny #bunnytrash